विटनेर,दि. १७ ऑक्टोबर – येथील वक्रतुंड मंडळ, पाटील वाडा आयोजित नवरात्रोत्सवाचे औचित्य साधून अखिल भारतीय अंधश्रद्धा निर्मूलन समितीतर्फे (अंनिस) अंधश्रद्धा निर्मूलन, भोंदू बाबांची फसवेगिरी आणि मानसिक आरोग्य या विषयांवर जनजागृतीपर मार्गदर्शनाचा कार्यक्रम शुक्रवारी दि. १७ ऑक्टोबर संध्याकाळी उत्साहात पार पडला. कार्यक्रमप्रसंगी अ. भा. अंनिसचे प्रसिद्धी प्रमुख श्री. महेश शिंपी यांनी प्रास्ताविक करताना समितीच्या कार्यपद्धतीची व ध्येयधोरणांची माहिती दिली.
वैज्ञानिक दृष्टिकोन आणि प्रात्यक्षिकांची जादू:
जिल्हा संघटक श्री. विनोद सपकाळे यांनी उपस्थितांना वैज्ञानिक दृष्टिकोनाचे महत्त्व समजावून सांगितले. त्यांनी विविध चमत्कारांमागील वैज्ञानिक सत्य उघड केले. यामध्ये:
• भूत पकडण्याचे दावे,
• पाण्यावर दिवा पेटवणे,
• मंत्रांच्या सामर्थ्याने होम पेटवणे,
यांसारखे विविध प्रयोग प्रत्यक्ष दाखवून भोंदू बाबा लोकांच्या भाबडेपणाचा कसा गैरफायदा घेतात, हे सिद्ध केले. अंधश्रद्धेमुळे नागरिकांचे शारीरिक, मानसिक आणि आर्थिक शोषण कसे होते, याबद्दल त्यांनी सविस्तर माहिती देत सावध राहण्याचे आवाहन केले.
मानसिक आरोग्याची जपणूक आणि नवरात्रीचा खरा अर्थ:
यानंतर डॉ. जयेश वाल्हे यांनी ‘मानसिक आरोग्य व काळजी’ या विषयावर व्याख्यान दिले. नवरात्रीतील देवीच्या नऊ रूपांचा सामाजिक व व्यावहारिक संदेश गावकऱ्यांना उलगडून सांगताना ते म्हणाले, “जसा आपण नवरात्रात शारीरिक उपवास करतो, तसाच मनातील नकारात्मकता काढून टाकण्यासाठी ‘मानसिक उपवास’ करणेही गरजेचे आहे.” मानसिक आजार आणि अंधश्रद्धा यांच्यातील परस्परसंबंध स्पष्ट करत त्यांनी मानसिक आरोग्याची काळजी कशी घ्यावी, याचे मार्गदर्शन केले.
हा प्रबोधनात्मक उपक्रम यशस्वी करण्यासाठी युवा सामाजिक कार्यकर्ते श्री. नवल परदेशी यांच्यासह वक्रतुंड मंडळाच्या सर्व कार्यकर्त्यांनी विशेष परिश्रम घेतले. या कार्यक्रमाला विटनेर ग्रामस्थांची मोठी उपस्थिती लाभली होती.
