जळगाव : सेंटर ऑफ इंडियन ट्रेड युनियन्स (सिटू), जळगावतर्फे खूबचंद सागरमल विद्यालय येथे बांधकाम व घरेलू कामगारांच्या विद्यार्थी पाल्यांसाठी शैक्षणिक सहाय्यता कार्यक्रमांतर्गत मोफत वह्यांचे वाटप करण्यात आले.
व्यासपीठावर प्रमुख अतिथी म्हणून मानवी हक्क संरक्षण व जागृती संघटनेचे जिल्हाध्यक्ष अमोल कोल्हे, सिटूचे कामगार नेते कॉ. विजय पवार, कॉ. रावसाहेब धोबी, कॉ. विजय कोळी, घरेलू कामगार संघटनेच्या पदाधिकारी कॉ. आशाबाई महाजन, कॉ. निर्मला भावसार, कॉ. संगीता भावसार तसेच खूबचंद सागरमल विद्यालयाच्या मुख्याध्यापिका श्रीमती योगिनी बेंडाळे यांची उपस्थिती होती.
कार्यक्रमाच्या प्रारंभी भारतरत्न डॉ. बाबासाहेब आंबेडकर, महात्मा ज्योतिराव फुले व क्रांतिज्योती सावित्रीबाई फुले यांच्यासह प्रतिमांना पुष्पहार अर्पण करून अभिवादन करण्यात आले. त्यानंतर उपस्थित मान्यवरांच्या हस्ते विद्यार्थ्यांना मोफत वह्यांचे वाटप करण्यात आले.
श्री. अमोल कोल्हे यांनी विद्यार्थ्यांना मार्गदर्शन करताना सांगितले की, “विद्यार्थ्यांनी कठोर परिश्रम, शिस्त व प्रामाणिकपणाच्या बळावर शिक्षणात यश मिळवावे. शिक्षकांच्या आदेशांचे व सूचनांचे पालन करावे तसेच मोबाईलचा मर्यादित व विधायक वापर करून ज्ञानवृद्धीवर भर द्यावा. तसेच वाटप करण्यात आलेल्या वह्यांचा सदुपयोग करून उज्ज्वल भवितव्य घडवावे, अशा शुभेच्छाही त्यांनी विद्यार्थ्यांना दिल्या.”
यावेळी कॉ. विजय पवार यांनी बांधकाम व घरेलू कामगारांच्या मुलांना पहिली ते दहावी तसेच उच्च शिक्षणासाठी शिष्यवृत्ती व विविध सामाजिक योजनांचा लाभ मिळवण्यासाठी घरेलू कामगार संघटना व बांधकाम कामगार संघटना, जळगाव यांच्याशी संपर्क साधावा, असे आवाहन केले. तसेच महाराष्ट्र इमारत व इतर बांधकाम कामगार कल्याणकारी मंडळ आणि महाराष्ट्र घरेलू कामगार कल्याण मंडळ यांच्या स्थापनेसाठी सिटूच्या लाल झेंड्याखाली दोन्ही संघटनांनी मोठा संघर्ष केल्याचे प्रतिपादन केले.
या शैक्षणिक सहाय्यता कार्यक्रमासाठी वैद्यकीय व विक्री प्रतिनिधी संघटना (MSMRA) आणि लाकूडपेठ, शिवाजीनगर येथील प्रमुख व्यावसायिक शैलेशभाई पटेल व शंकरभाई पटेल यांनी मोलाचे सहकार्य केले. सूत्रसंचालन शिक्षक श्री. लक्ष्मीकांत महाजन यांनी केले. कार्यक्रमास विद्यालयातील शिक्षिका सौ. कल्पना देवरे, सौ. करुणा महाले, सौ. सुनिता येवले, श्री. संतोष चौधरी, श्री. अजय पाटील यांच्यासह शिक्षकवृंद उपस्थित होते. कार्यक्रमाच्या यशस्वीतेसाठी सिटूचे कामगार नेते कॉ. विजय पवार यांच्यासह सिटू संघटनेचे पदाधिकारी व कार्यकर्त्यांनी विशेष परिश्रम घेतले.
