मुक्ताईनगर,( दि. ५ मे ) — तालुक्यात काल घडलेल्या भीषण रस्ते अपघातात नवरा-बायकोचा जागीच मृत्यू झाला असून त्यांच्या लहान मुलीला गंभीर दुखापत झाली आहे. या घटनेमुळे परिसरात शोककळा पसरली आहे.
प्राथमिक तपासात समोर आलेल्या माहितीनुसार, संबंधित आयशर वाहनाला केळी वाहतुकीसाठी नियमबाह्य पद्धतीने लोखंडी पट्ट्या बसवण्यात आल्या होत्या. या धोकादायक बदलामुळे अपघात अधिक तीव्र झाला आणि दोन जणांना प्राण गमवावे लागले, अशी माहिती पोलिसांनी दिली.
या प्रकरणात पोलिसांनी केवळ अपघाताचा गुन्हा नोंदवण्याऐवजी कठोर कारवाई करत भारतीय न्याय संहिता (BNS) २०२३ च्या कलम १०५ अंतर्गत ‘सदोष मनुष्यवध’ाचा गुन्हा दाखल केला आहे. या कलमानुसार हा अजामीनपात्र गुन्हा असून, दोषी आढळल्यास कठोर शिक्षेची तरतूद आहे.
कलम १०५ (BNS) काय सांगते?
या कलमानुसार ‘सदोष मनुष्यवध’ हा जीवितहानी घडवणारा गंभीर गुन्हा असून तो खुनाच्या श्रेणीत येत नसला तरी अत्यंत गंभीर मानला जातो. मृत्यू घडवण्याचा हेतू सिद्ध झाल्यास जन्मठेप किंवा १० वर्षांपर्यंत कारावास व दंडाची शिक्षा होऊ शकते. तसेच दुखापत करण्याचा हेतू असल्यास १० वर्षांपर्यंत कारावास किंवा दंडाची तरतूद आहे. हा गुन्हा अजामीनपात्र आहे.
दरम्यान, या घटनेमुळे वाहनांमध्ये नियमबाह्य बदल करण्याच्या प्रवृत्तीवर पुन्हा एकदा प्रश्नचिन्ह उपस्थित झाले आहे. वाहनांमध्ये अतिरिक्त लोखंडी रचना बसवणे किंवा सुरक्षिततेकडे दुर्लक्ष करणे किती घातक ठरू शकते, याचे हे दुर्दैवी उदाहरण ठरले आहे. अशा बेकायदेशीर बदलांमुळे अपघाताची तीव्रता वाढून जीवितहानीची शक्यता अधिक होते, असे तज्ज्ञांचे मत आहे.
प्रशासनाने अशा प्रकारच्या बेकायदेशीर बदलांवर कडक कारवाई करण्याची गरज व्यक्त होत असून, नागरिकांनीही रस्ते सुरक्षा नियमांचे काटेकोर पालन करावे, असे आवाहन करण्यात येत आहे. कोणतेही अनधिकृत बदल टाळावेत व अशा धोकादायक प्रकारांची माहिती प्रशासनाला द्यावी. एका चुकीमुळे संपूर्ण कुटुंब उद्ध्वस्त होऊ शकते, हे या घटनेतून पुन्हा अधोरेखित झाले आहे.
